السلام عليكم ورحمه الله
صباح الليل ومساء الصبح
حصيصه والبيضه
حصيصه من عائله قرويه تسكن باحدى القرى التابعه لمنطقة الرياض>>>ترى هذي البدايه عاقله
يعني اني مستحيه والا الخبال قادم
كانت حصيصه ذات التسع سنوات ..ذات السنون اللي قدام متكسرة وواحدن منهم مشرروم تقل
قشارة بطاطس ههههه
كانت حصيصه ذات يوم تلعب وتسرح وتمرح مع صويلح ولد الجيران واخوها عبيد ونوير وباقي
بزران الحاره
و في يوم من الايام كانو عيال الحاره يلعبون كورة وحصيصه ونوير وباقي البنات يشجعون
ويصارخون
ومع التشجيع والحماس تجي الكورة براس حصيصه ..وطاحت غشيه ومغشين عليها
ونوير تصارخ الحأوني ياقماعه دي البت غشيت >>>متاثره بالمسلسلات المصريه اللي تجي على القناة الاولى
(الحقوني ياجمماعه الربع البنت غشت ))
جا صويلح وعبيد وتشاقلوها وودوها للبيت ويوم شافتها ام حصيصه قالت حصيصه جعلتس الماحي
اللي يمحاتس يومني قايله لتس لاتروحين تشجعين عيال الحارة انتي ونوير..وش فادتس فيه يوم
طحتي مغشين عليتس .
قال صويلح خاله تراها تفاودز ..قال عبيد يووماااااااااه البنت غشيه وتبوسم لايكون ميته وهي
مبتسمه ..ياحظها الكلبه يمكن تجي شهيده ..ام حصيصه :جعلك الشرّ بلا لاتفاول على اختك
يامال
الضعفه اللي تضعف حيلك وتقطع نيلك
وتشاقلوا حصيصه ودخلوها بالحوش
وطلعت الجده بالحوش قالت وش ذا الزعاق وشافت حصيصه غشيه وشافت ام حصيصه تدعي على
بنتها ..قالت وجع يوجعتس بنتس غشيه وانتي ترجدينها بالدعاوي
بدال ماترششينها بمويه تقومين
تهاوشينها وهي مهيب داريه عنتس
بعد برهه من الوقت >>يمديكم على برهه هههههه
صحت حصيصه ولقت جدتها وامها قالت يمه وين انا فيه قالت امها بالحوش وين بعد قالت وش انا
منسدحه عليه قالت امها على الحصير
قامت حصيصه وهي ضايقن صدرها بالحيل
>>كانت تتمنى تنوم بالمستشفى عشانهم يحطون الفطور بيض مسلوق
المهم قررت تلعب على اهلها وتمثل دور اللي انخبلت من الطقه ..
المهم قامت تناقز وتكركر
قالت امها هاو وش جاتس يامال اللي
قالت حصيصه :وش جااه محبوبي مشى وخلاني
قالت ام حصيصه :مانتيب صاحيه عقب الشوته اللي جتس
قالت حصيصه :والله انا انا لاوريه والله انا انا مخليه
قالت امها :وجع يابنت وش فيتس يامال العلّه
قالت حصيصه :علّني مابكي عليك >>>من تاثير الرادوا عليهم
قالت امها :اقول ياعبيد دق على ابوك يجي نوديها للمستشفى شكلها انخبلت
قالت حصيصه:جاك يامهنا ماتمنى وجتك ياحصيصه البيضه
جا الابو :وودوها وكشفو عليها وقالو مابها خلاف ولا نوموها وقالو لابوها كانها ماتحسنت ودوها
لشهار ..احتمال يكون جايها ارتجاج
طبعا حصيصه ماحطت ببالها انها بتجدع بشهار :المهم كل يوم تتخيبل وكله عشان هالبيضه
المسلوقه
